كشف حازم إمام عضو مجلس اتحاد الكرة، ونجم نادي الزمالك السابق، عن رأيه في ملف انتقال اللاعب إمام عاشور، إلى صفوف النادي الأهلي، في صفقة أثارت جدلًا كبيرًا بين جمهور القلعة البيضاء.
وأكّد إمام أن جمهور الزمالك له الحق في الشعور بالغضب بسبب انتقال إمام عاشور للنادي الأهلي، باعتبار أن الفريق الأبيض هو صاحب الفضل في بزوغ نجم اللاعب.
وأضاف خلال لقائه ببرنامج “مساء دي إم سي” الذي تقدمه الإعلامية إيمان الحصري بقناة “دي إم سي”: “الزمالك هو اللي طلع وبروز إمام عاشور علشان كده الجماهير زعلانة على انتقاله للأهلي”.
ولفت حازم إمام: “بلا شك إمام عاشور لاعب كويس جدًّا وصفقة كرة قوية وكويسة جدًّا للنادي الأهلي”.
كما أضاف حازم إمام في سياق آخر أن :”لقطة حسين الشحات مع الشيبي مالهاش لازمة وشكلها مش حلو خصوصًا أن النادي الأهلي أخد الدوري أساس والموضوع ما فيهوش أي عصبية وفيه ناس كتير متفرجتش على الماتش لأن البطولة خلصت والمباراة تحصيل حاصل ومفيش منافسة”.
وأضاف: “اللقطة شكلها مش حلو للاتنين، الولد اللي اتضرب مش مصري وبنعتذر له، ولا لحسين الشحات اللي اعتذر، ولقطة زيدان في كأس العالم لما ضرب لاعب إيطاليا الكل شاف زيدان وهو بيضرب بس محدش سمع لاعب إيطاليا شتمه وقال له إيه”.
وأكد حازم إمام: “غير مقبول بأي تجاوز ومع أي خطأ لازم يبقى فيه اعتراف بالخطأ، الخطأ خطأ بعيدًا عن التبرير، رابطة الأندية أصدرت عقوبة والأهلي طبق العقوبة قبل الرابطة وكنت شايف أن عقوبة الرابطة كان ممكن تبقى أكتر من كدا مش ماتشين بس، وبعدين تروح لجنة التظلمات، بس اللي حصل دا مش طبيعي خاصة أن حسين الشحات لاعب كبير”.
